Wednesday, October 29, 2008

உங்கள் சிந்தனைக்கு...


தாராளமயக் கொள்கை

இனவெறி
மதவெறி
பணவெறி
எங்கள்
ஆட்சிக்கானக் கொள்கை...

அராஜகம்
சர்வதிகாரம்
அடக்குமுறை
எங்களின்
எழுதப்படாத சாசனம்

ஊடகச் சுதந்திரம்
மக்கள் சுதந்திரம்
எங்கள்
நரி தந்திரத் தணிக்கை...

ஆட்சியில் அமர்த்திய
உங்களை
ஆட்டிப் படைப்பதே
எங்கள் முழுமுதற் சேவை...

***

யானைக் காது

நீதிக் கேட்டு
வீதியிலே
பாமரர்களின் கூக்குரல்...

உரிமைக் கேட்டு
ஒடுக்கப்பட்டவர்கள்
ஒப்பாரி...

ஏழைகளின்
புலம்பலோசைத்
திக்கெங்கும் ஒலிக்கிறது...

"எனக்கு
யானைக் காது"...
என்ற பிரதமர்
செவிடராய் கும்பகர்ணன்!

***

இடைத்தேர்தல்

இத்துப் போன
பலகை வீடு
இளிச்சபடி இருக்க

பித்துப் பிடித்தச்
சொந்தக்காரன்
தீ வைத்தான்...

"அய்யோ... அய்யய்யோ
இருக்குற ஒடச்சல் வீட்ட
நெருப்புக்கு தர்றீயே
நீ என்ன பைத்தியமா?"
அலறினாள் பொண்டாட்டி...

"போடீ
போக்கத்தவளே
நடுரோட்டுல போய்
ஒப்பாரி வை.."

இடைத்தேர்தல்
வந்துருச்சி!!!

எழும் நேரம்..

இது
எழும் நேரம்!

வீழ்ந்த
உரிமைகளைப் பிடித்துயர்த்தி
சனநாயக முரசு
ஒலிக்கும் நேரம்!

இது
சமூக விடுதலைக்கான நேரம்!
காத்திருந்தால்
கண்போல் காத்த
கொள்கைகள்
பறிபோகும் நேரம்!

அக்கினி நாவுகள்
விச வார்த்தைகளைக்
கக்குகின்றன..
இனவாதப் பாம்புகள்
சுய சட்டைகள்
உரித்தாடும் தந்திர நேரம்!

இதுவரை
அழகுக்காய் அணிந்த
அச்ச சட்டைகளைக் கிழித்தெறிந்து
வீர ஆடைகளை
உடுத்தும் நேரம்!

பிறப்பது
ஒருமுறைதான் என்றாலும்
இறப்பதும் ஒருமுறைதான் - என
வேள்வித் தீயில்
உயிர் துறக்கும் நேரம்!

நமது
சன்மார்க்க நீதிக்கு
சாவுமணியடித்த ஆட்சிக்கு
நம் சாதனை மரணம்... வீரம்!
தருக்கர் நெஞ்சை
சண்டமாருதம் செய்யும் தூய நேரம்!

வீசிப்போகும் புயலைக்
கையில் பிடித்து
ஊசிப்போன ஆட்சியை
மரண ஊஞ்சலில்
தாலாட்டும் நேரம்!

பறிபோன உரிமைகளைப்
பாதகர் கைகளிலிருந்து
பறித்தெடுக்கும் வினாடியில்
நம் உயிர்
பறி போகும் நேரம்!

கொதி எரிமலையின்
உச்சியில் நின்று
எரி குழம்பைக் கையில் ஏந்தி
ஊழல் அரசியலைச்
சாம்பலாக்கும் அக்கினி நேரம்!

வீணர் ஆட்சியில்
சிறைப்பட்டச் சுதந்திர உணர்வை
மீட்டெடுக்கும் சத்தியப் போரில்
வீரக் காவியமாகும் நேரம்!

இருட்டு அரசியல் பூதத்தின்
தலையறுத்து
மெழுகுவர்த்திகள் ஏந்தி
வெற்றி ஊர்வலம் வரும் நேரம்...

இது
நமக்கான நேரம்!
நெருப்பு நதியில்
நீந்தி வர
காலம் தள்ளி விட்ட
கார்கால நேரம்!

கவிஞர் பிரான்சிசு
மால்மோ, சுவீடன்
khileefrancis@yahoo.com

Friday, October 17, 2008

தடை


இது
மக்கள் அரசா
மாக்கள் அரசா?

ஏழைத் தமிழர்களின்
அடிப்படை உரிமைகளை
உலையில் வைத்து
திருவிழா கொண்டாடும்
மாயாசால அரசு
மக்கள் அரசா
மாக்கள் அரசா?

காட்டு தர்பார் ஆட்சி
கன கச்சிதமாய்
கடைவிரிக்கப்பட்டுள்ளதின்
கண்றாவி அடையாளம்
'இண்ட்ராஃப்' இயக்கத் தடை!
சமாதானப் புறாக்கள்
எழுப்பியக் கேள்விகளுக்கு
என்னதான் விடை!
பதிலாகத் தருகிறார்கள்
வில்லோடு வரும்
போலீஸ் வில்லாளர் படை!

சன்மார்க்க நெறியின்
நியாய உரிமைகளைச்
சமாளிக்கத் திராணியற்ற
சகுனி அமைச்சர்கள்
சர்வாதிகாரத் தடையுத்தரவை
அதிகாரக் கைகளில்
ஞானப் பழமாய் ஏந்தினார்கள்

எளியர்களின்
குரல்வளை நெறித்து
அரசியல் சாணக்கியர்களின்
ஆடம்பர விருந்துகளில்
இன்ப கீதங்கள் பாடும்படி
கட்டளையிடுகிறார்கள்...

அடக்கப்பட்டவர்கள்
அலைகடலாய் பொங்கியபோது
சிறுபுல் தடுக்கி விழுந்த
மந்திரிமார்கள்
மாந்தரீகத் தாயத்துகள் அணிந்து- இன
மாயைத் தடை போட்டார்கள்...

நாங்கள்
மக்கள் அரசல்ல
மாக்கள் அரசு
மாசுநிறை அரசு என்பதை
மாசில்லா உலகிற்கு
நிரூபணம் செய்தார்கள்!

தங்கள்
பற்களின் மஞ்சள் கறையைப்
பசை கொண்டு தேய்க்க
சோம்பல் கொண்டவர்கள்
பாயும் உரிமைப் புலியின்
பல்லைப் பிடுங்க
"திருப்புளி" சட்டம் ஏந்தினார்கள்

தென்றல் கன்னியைத்
தங்கள் படுக்கையறைகளில்
தாராளமாக நுழைய விட்டவர்கள்
சூறாவளியாய் எழுந்தவர்களைச்
சிறைக் காட்டிற்கு அனுப்ப
காவலர் கைகளைக்
கட்டவிழ்த்து விடுகிறார்கள்.

அதிகாரப் போதையில்
ஆட்சிக் கட்டிலில்
படுத்துறங்கும் கும்பகர்ணர்கள்
எழுச்சி பெற்ற மக்கள்
வீழ்ச்சியடைய
மீளா யாகம் வார்க்கிறார்கள்...

"இண்ட்ராஃப்"
இரண்டொருவர் அல்ல
இலட்சம் இலட்சமாய்
படை திரண்ட
இலட்சியப் போராளிப் பாசறை

ஆயிரம் தடைகளைத்
தாண்டி முன்னேற
ஆயிரம் ஆயிரமாய்
பொங்கி எழும் புதுப்புனல்

தருக்கர் ஆட்சியின்
தடையுத்தரவில் அஞ்சி
மூங்கில் காட்டில் பதுங்கி ஒளியும்
சிறு நரியல்ல...
வேட்கையுடன் பாயும்
வேங்கை "இண்ட்ராஃப்"!